في بعض الاحيان اجدها صحيحة نوعا ما....
وش الفايدة من عتب شخص كان بالنسبة لك كل شيء وتخلى عنك فجأة؟. ما اشوف لها لزوم العتب
او خلنا نبدا الموضوع بدندنة لعبادي اخطبوط العود
(ماعلى الدنيا عتب..... كل مافيها أماني)
سؤالي الاول اللي يطرحه عقلي علي....بما اني اليوم اشوف الكون من وجهة نظر - مقلوبة
اذا الدنيا بكبرها ما نعتب عليها
لان حديث قال لنا انها زائلة
يعني الدين حذرنا من الدنيا وصرنا ندعي انه يارب لاتفتنا مفاتن الدنيا وتنسينا عمل الاخرة
طيب....... كل شيء ما عداها يستاهل العتب؟
مدري.... فيني لخبطة فكرية مو مخليتني اصلا ارتب افكاري بمنطقية زي العادة...
جزء مني مفقود
والجزء هذا كان مكملني لدرجةاني ضعت من بعده؟
مدري ليش اعتب وانا اعرف ان كل قصة لها نهاية درامية في هذا المكان
ودائما النتيجة
قلب مكسور
ودمع
و محاولة جديدة للنسيان
وانك تعيش حتى لو كنت ميّت
محاولة العتب تجاه ناس مايعني لهم العتب سوى (شرهة) معناها محاولة فاشلة لفهم
سبب تدهور الامور وانت عارف ان النهاية منطقية..... بعد المسافة وبعد القلوب واختلاف الراي وشخص يسمع كثير لكلام الناس ..... مدري
لا تزال بداخلي مليون سؤال يتمحور ويدور حول (ليه) ولا اعرف لهالسؤال اجابة
ولا لي نية في العتب
لان زي ماقال بوسارة
ماعلى الدنيا عتب
ماعلى الدنيا عتب
***
ماعلينا... امس ما داومت وبديت يومي كله بافتتاح المستشفى اللي رحت له من بدري
الموظفات نفسهم مابعد يداومون وياربي كيف اباخذ موعد لهالدكتور الاخصائي في الصدرية والقصبات الهوائية؟
الخوال دائما يساعدون بس لاتحاول تمزح معهم من الصبح
هذا اختصار شرحي لموظف الاستقبال اللي كان الوحيد اللي مشغل جهازه الكمبيوتر.....
اخذت ورقة الموعد وصعدت على السلم للدور الثاني....وكان عندي موعدين... واحد لدكتور زكوان للصدرية لانه الليلة السابقة تفاقمت الامي وماقدرت انام من جد..... من جد من جد الوضع كان جدا مؤلم
لما ماتقدر تنام على جنبك اليمين ولا اليسار بسبب ان عضلاتك فيها تمزق شديد والخوف انه يكون التهاب
واللي خلاني اخاف كذه لما مسكت الوالدة جزء من العضلة مجرد لمستها وعاجلتني كل الام الدنيا وقتها
بعد المسكنات القوية اللي اعتقد ان جسمي كوّن مناعة ضدها
قررت انام على ظهري ومافاد لانه كان برضه الالم ممتد لنهاية جذعي الاسفل.... متعب انك تبي تنام ومو قادر
المهم
الاخ الخال قال انه العيادتين في نفس الدور
وهذه هي مشكلة الخوال لا طلبت منهم خدمتين في وقت واحد
يزلبون لك ويعصبون
رحت للدكتور وبعد الفحوصات..... تبين ان كل شي داخلي سليم الحمدلله
لا التهاب قصبات ولا عطب في الرئة ولا مشاكل تنفسية
استدعى هذا التصريح اني افصخ ملابسي...وعقدي اللي اتفاءل فيه واوقف قدام الة الاشعة
طلعت السالفة كلها احتياج للراحة فقط
اليوم ثاني يوم راحة واتمنى انه يخف لانه من جد قلة النوم تخلي الواحد يتنرفز بسرعة وعلى اتفه الاسباب
الدكتورة الثانية خقت على بنطلون الجينز اللي لبسته وسئلتني من وين تجيب زيه وبعد هالكلام الحلو
قالت مشينا نكشف
كنت اتوقع ردة فعلها
بس كنت اتمنى القى عندها الحل.....وللاسف زي اي دكتور اخر
تفتقد للشجاعة المهنية انها تقول بعد كلمة (ازاي كده) انه هذا الشخص يحتاج لتصحيح جراحي
انا جوعان والغدا اليوم شسء مرة جميل
احب امي لما تحس انه نفسيتي محبطة
تحاول ترفع من معنوياتي بالاكل
صحيح انها طريقة شوي مو مفيدة كثير لكنا تفي بالغرض حاليا
الله يخليك يا مامتي
